Líttu ekki um öxl

Lögreglan er kvödd til þegar lítil telpa hverfur í friðsælum norskum smábæ. Sama dag er tilkynnt að unglingsstúlka þar í bænum hafi fundist myrt í nágrenninu. Sejer lögregluforingi fær nú það verkefni að komast til botns í flóknu máli sem reynist eiga sér langan aðdraganda.

Norski höfundurinn Karin Fossum (f. 1954) hóf feril sinn sem ljóðskáld og eftir hana liggja þrjár ljóðabækur og tvö smásagnasöfn, en á síðustu árum hefur hún nær alfarið snúið sér að ritun glæpasagna. Áður hefur komið út á íslensku fyrsta sakamálasaga hennar, Augu Evu, sem hlaut afar góðar viðtökur í Noregi. Líttu ekki um öxl er önnur saga Karinar Fossum af þessum toga og ekki síður spennandi en sú fyrri. Eins og áður er það lögregluforinginn og ekkillinn Konrad Sejer sem er í aðalhlutverki og honum til aðstoðar er hinn skarpskyggni félagi hans Skarre.