Enn af Jóni Oddi og Jóni Bjarna

Jón Oddur og Jón Bjarni verða heldur betur undrandi þegar gamall maður birtist skyndilega heima hjá þeim og segist vera afi þeirra. Kormákur afi býr yfir mörgum spennandi leyndarmálum sem drengirnir verða að komast að. Bræðurnir fara í sumarbúðir þar sem gengur á ýmsu og margt fer á annan veg en ætlað var. Uppátækjum drengjanna virðast engin takmörk sett og er útkoman bráðfyndin og ógleymanleg saga.

Sögurnar um Jón Odd og Jón Bjarna voru frumraun Guðrúnar Helgadóttur á bókmenntasviðinu. Þær komu fyrst út á áttunda áratugnum og og hafa margsinnis verið endurprentaðar. Bækurnar um bræðurna eru með allra söluhæstu barnabókum eftir íslenskan höfund enda er stöðug eftirspurn eftir þeim. Guðrún hefur hlotið Norrænu barnabókaverðlaunin fyrir bækur sínar og hafa erlendir ritdómarar skipað henni á bekk með Astrid Lindgren, Torbjörn Egner og Anne-Cath. Westly.