Paula

Þegar Paula, dóttir Isabel Allende, veiktist af illvígum sjúkdómi og féll í dá skömmu síðar settist móðir hennar við rúmstokkinn hjá henni og hóf að rita henni bréf sem hún gæti lesið þegar hún vaknaði. Smám saman varð til bók þar sem jafnhliða er rakin átakanleg sjúkdómssaga Paulu og skrautleg fjölskyldusaga þeirra mæðgna þar sem Isabel sjálf, móðir hennar og Paula eru í brennidepli.

Þetta er heillandi saga, full af persónutöfrum skáldkonunnar sjálfrar sem á erfitt með að taka nokkurn hlut alvarlega en neyðist þó hér til að fjalla um erfiðustu andartök ævi sinnar. Gagnrýnendur eru á einu máli um að með þessu verki hafi Allende tekist eins vel upp og með Hús andanna.